سمن جيشك يأكلك

عارفك وعارف ملامحك , وعارف تعاريج الجلد فى جبينك , 

انت ابن بلدى اللى كنت يوم باخدم مكانك فى جيش بلادى ,

فاكر يا دفعة لقمة العيش وعليها حتة المربى أو الحلاوة أو الجبنة 

طيب فاكر لما كنا بنتآنس بعصفورة طايرة فى السما 

طيب فاكر لما كنا مش عاجبنا معاملة الظابط 

فاكر لما حط البيادة على الشباك وأمرنا كل أما نعدى عليها نضرب تعظيم سلام 

طيب فاكر لما أخدت جزا عن واحد زميلى لأنى خلاص كام يوم واسلم المخلة

طيب فاكر الخطة بدر , وفاكر العدو ؟

طيب فاكر لهفتنا على أجازة 

ونطلع من الكتيبة ونمشى وسط الناس 

طيب فاكر الناس ؟

فاكر اللى كان بيتاخر لك علشان تقعد جنبه على الكرسى 

فاكر اللى كان بيعزم عليك يدفعلك أجرة العربية 

فاكر الست الكبير اللى كانت تمسكك من إيدك وتعدى بيك من قدام الشرطة العسكرية 

فاكرهم والا نسيتهم 

قتلتهم ليه؟

غيرت الخطة بدر وغيرت العدو ليه ؟

جالك قلب ترفع سلاحك ومن غير ماتنشن تطخ 

مين قسى قلبك على اخواتك؟

مين مسح عقلك مين غيم عنيك ؟

كان أهون عليك يقتلوك ولا تقتل اخواتك 

ماتقولش مش بيدى وأنا عبد المأمور 

ملعون مأمورك 

  

وفر دموعك يا ابن بلدى 

وفرها لما تنزل أجازة هاتلاقى مياتم كتيرة فى بلدكم 

ورينا إزاى هاتبص فى عنين الناس

إزاى هاتطلب الرحمة للمقتول والصبر للمفجوع 

البس لبسنا وامشى وسطنا وادعى ربنا 

مايجيش زميل ليك بسلاحة يختارك من بين الناس فى الجنازات 

اجرى قدامة والعن سلسال أهله 

قل له أنا معاك يا دفعه ومش هايصدقك 

هاينفذ الأوامر ويضغط الزناد 

ماتجيش عندنا , ولا بقيت ابننا

احسن لك خليك هناك عند اللى اشتراك وما ظلم لولاك 
واتصل بأهلك اطمن , شوف امك سليمة ولا سحلوها 
اختك مكانها ولا فى الزنزانة حبسوها 
اخوك فى علام الأزهر ولا واخد كام سنة سجن
يا ميت خسارة على الجدعان 

قتلونا باولادنا 

الشعوب تقوى جيوشها تحميها 

واحنا جيشنا واخدنا هياكل نشان